As TICs no cole (5)

Xa como remate ao apartado "As TICs no cole" quero comentar algo que diferencia a este cole doutros moitos...
No meu cole de prácticas a informática non é algo accesorio, senón que as novas tecnoloxías teñen a consideración de ferramentas educativas.
Non hai clases de informática, o que ocorre é que a informática se integra dentro da aula sen un horario específico e en relación coas outras áreas de estudio.
Ensínaselles aos nenos, xa desde Infantil, que os ordenadores son unha ferramenta de traballo, útil para obter información, como vía de comunicación... e ao mesmo tempo que se habitúan ao uso desta ferramenta están a traballar outros contidos (lecto - escritura, matemáticas...)

Podedes ler máis no seguinte artigo de Vieiros: Un cole diferente, publicado con motivo do XX aniversario do colexio.

No tempo que alí estiven os nenos de 4 e 5 anos usaron o ordenador en varias ocasións, usamos o radio-CD para poñer música en algunhas sesións de psicomotricidade e tamén para escoitar panxoliñas...
As cámaras dixitais tiveron protagonismo en moitos momentos de aula: nos obradoiros de cociña - cando fixemos turrón de chocolate (en 5 anos), polvoróns (en 4 anos) ou masa de sal cos máis pequenos..., na festa de Nadal...
Tamén nos días previos ao festival de Nadal apareceu pendurado do teito do patio o canón proxector que tivo o seu protagonismo na festa de Nadal de Primaria...

Blog: e iso que é...???

Resulta paradóxico que a estas alturas me plantexe que é un blog.
Si, paradóxico, porque o que agora mesmo estou escribindo vai aparecer publicado nun, no meu... e aínda que agora xa sei o que é un blog, non fai tanto tempo que os descubrin.
Para os que non o saiban, un blog é un diario na web. O termo proven das palabras web + log (web = rede + log = diario)
Tamén se chaman cadernos de bitácora, sobre todo, cando o autor escribe sobre a súa vida como se fose un diario.
É un sitio web no que un ou varios autores escriben os seus textos ou artigos, que se actualiza periodicamente e que admite comentarios referentes aos artigos publicados. Os artigos aparecen en orde inverso a súa publicación e poden incluir texto, imaxes, videos, enlaces...
Crear un blog como este é sinxelo. Hai servidores na rede - como Blogger, Myspace, Obolog e outros - que permiten crear un blog en poucos pasos de xeito gratuito. Proporcionan un aloxamento ou dirección web para o blog e unha interfaz que permite a súa xestión de xeito sinxelo.
Para blogs máis complexos, onde sexa necesario un control total sobre a súa funcionalidade, é precisa a instalación dun software de xestión de contidos.
Co blog creado logo só queda darlle continuidade...

Pensando, pensando non deixa de asombrarme a enorme cantidade de blogs que hai, xa só relacionados coa educación... dende inicios do século XXI que é máis ou menos cando surxiron. Isto lévame a reflexionar sobre a importancia que a sociedade actual lle da as TICs, importancia á que a escola non pode permanecer allea.
Xa non é posible imaxinar unha escola que lle feche as portas á tecnoloxía porque os nenos e adolescentes que enchen as aulas naceron e medraron rodeados de tecnoloxía, de Internet... Por iso son necesarios novos enfoques educativos que lle den cabida ás TICs nas aulas e que lle proporcionen aos alumnos as competencias necesarias para desenvolverse nesta sociedade.

As TICs no cole (4)

Ola de novo!!!
O meu período de prácticas está rematando e... cómo me gustaría seguir no cole onde estou. Supoño que non son a única pois a experiencia está sendo moi boa...

En días anteriores fun contando como se integran as TICs nas aulas de Infantil e hoxe vou contar algo máis polo miudo os recursos cos que conta o centro.
En Infantil hai un ordenador por aula, con conexión a internet e ademais tamén hai reproductores de son.
No resto das aulas hai un ordenador con conexión a internet, unha impresora, autofalantes e auriculares e un reproductor de son.
O centro conta ademais cunha aula de informática coa seguinte dotación:
- 15 ordenadores con conexión a internet
- un encerado dixital
- unha impresora laser
- outra de chorro
- un escaner
Por outro lado conta con recursos que podemos chamar móviles, tanto informáticos (ordenador portátil e canón proxector) como audiovisuais (televisión, vídeo, DVD e 2 cámaras de vídeo e fotografía dixital)
Outros espacios onde podemos atopar ordenadores son:
- a sala de profesores, onde hai varios ordenadores (4 - 5) e unha impresora para o uso dos profes
- en dirección
- nas oficinas da entrada, onde ademais hai unha fotocopiadora

As TICs no cole (3ª parte)

Hoxe estiven na aula de 5 anos e pola tarde fixemos xogos matemáticos. Entre as diferentes opcións que había unha era o ordenador...
Sirveme isto de introdución para contarvos cando e de que maneira se introduce o ordenador en Educación Infantil neste cole.

O contacto co ordenador iníciase en 3 anos no 2º trimestre. Inicialmente fan actividades de familiarización, uso libre do teclado e un programa de debuxo parecido ao paint. Máis tarde empezan a usar material externo que inclúen nas dinámicas e nos proxectos da aula como "A ratiña Lola", "Pipo"...

En 4 anos empezan no proceso de adaptación co xogo dos nomes (co seu nome e o dos amigos da clase), tamén usan materiais externos e o programa de debuxo. A partir do 2º trimestre introducen o ordenador na súa metodoloxía por proxectos, fan un diccionario temático dos proxectos que van traballando e inicianse na búsqueda de imaxes significativas dos proxectos que xa traballaron a nivel de lecto-escritura e que van incluir posteriormente na realización de murais, albums...

En 5 anos comezan cun repaso do xogo dos nomes pero inician tamén un diario no ordenador (trátase de que cada neno escriba periódicamente algo no diario da clase). Tamén continúan coa búsqueda de imaxes, co programa de debuxo... Como novidade, no 3º trimestre crean unha conta de correo-e como ferramenta de comunicación, un conto dixital e fan un ficheiro individual de contos lidos.
Deste xeito se inician os nenos deste cole no uso do ordenador... outro día contareivos máis cousas.
Ata a próxima!!!

As TICs no cole (2º parte)

Como vos prometera, seguín investigando sobre como se integran as TICs no meu cole de prácticas...
O cole ten 4 aulas de Infantil (de 2, 3, 4 e 5 anos), 6 de Primaria e 3 de Secundaria. O ano que ven completará Secundaria coa aula de 4º da ESO e a súa metodoloxía de traballo desenvólvese por proxectos.
En canto as TICs, o cole desenvolve nas súas aulas un Proxecto Curricular Tecnolóxico cuios obxectivos xerais son:

• facer un cidadán competente no uso das TICs, é decir, desenvolver os coñecementos, habilidades e competencias para o seu uso
• usar as TICs como ferramenta de aprendizaxe.

O cole conta no claustro de profesores cunha orientadora tecnolóxica que fai un seguimento de como se desenvolve o proxecto e asesora ao resto do claustro no uso das TICs na aula nos distintos niveis.
En canto ao equipamento todas as aulas contan cun ordenador e ademais o centro ten unha aula de informática.
Nos próximos días ireivos contando como se desenvolve este proxecto no ciclo de Infantil pero para que vaiades coñecendo máis cousas sobre as TICs no colexio Andaina deixovos un enlace un artigo publicado en Vieiros

As TICs no traballo por proxectos

AsTICs no cole (1ª parte)

Xa levo, xa levamos unha semana de prácticas, e eu estou moi contenta alá pola Coruña...
Estou no colexio Andaina na clase de 4 anos e temos un ordenador na aula, que os nenos e nenas usan con bastante frecuencia.
É unha das súas actividades preferidas para os tempos de xogo libre ou por recantos. Tamén se usa para poñer música mentres fan outras actividades...
Do que vin ata o de agora, vése que os nenos están habituados a andar con el xa que demostran bastante habilidade co rato mentras xogan, coñecen Google, saben do uso de Internet para buscar información...
Pero o uso das TICs no colexio é moito máis amplo que o que vos acabo de contar...
Seguirei investigando - como os nenos e nenos da miña aula están investigando sobre as árbores - e xa vos irei dicindo

Se queredes saber máis do meu cole:
colexio andaina
proxecto "O que somos"